Xk'eeb'al xkawub' li xna'leb' laj q'eqchi'

Li nasik’man sa’ li molam a’an xwaklesinkil ut xk’eeb’al xkawub’ ut xwankil li xna’leb’ laj Q’eqchi’ jo’  re xwaklesinkil rib’eb’ li poyanam, ab’an ch’olch’ooq naq a’an wan xyaalalil ut ink’a’ yal re xk’utb’esinkil.

Xe’k’eeman xtzolb’aleb’ naab’al poyanam sa’ xna’leb’ aj maay ut li roksinkil re naq t’oksimanq li na’leb’ a’in sa’ eb’ li k’aleb’aal re xch’ool Ixim.

A k’a’uxl a’in, a’an re xsik’b’al xb’ehel naq li xloq’al xwankilal xna’leb’ li qatenamit maay chi waklesimanq, li wotzok na’leb’ ut li roxloq’inkil li jalanq chik chi na’leb’, re naq tz’aqal yaal naq tnawmanq li wank sa’ k’iila paayil, rik’in jun tzolok sa’ ka’ paay chi aatinob’aal, Q’eqchi’ ut kaxlan aatin.

Xkawilal xmolameb’ li nab’ej yuwab’ej ut li xch’uutalileb’ li ixq

Li k’anjel a’in na xkut rix xwaklesinkil li xkulub’ eb’ li kok’al re naq ink’a’ te’ tz’eqtaanaq malaj jo’ ajwi’ li ixq. Li xch’uutulal eb’ li nab’ej yuwab’ej nak’eeman xkawub’ xb’aanaq a’an aajel ajwi’ ru sa’ xk’eeb’al xtzolb’al eb’ li kok’al. Anaqwan li junkab’lal ut li ixq yookeb’ chi tz’aqonk chi us re xchaab’ilob’resinkil li  tzolok reheb’ li saaj, kok’al sa’ xna’leb’ ut sa’ raatinob’aal. A’in nake’ xye ajwi’ chik raatineb’ anaqwan sa’ xk’eeb’al li tzolok.

Li k’anjel a’in yo chi b’aanumank sa’ eb’ li k’aleb’aal reheb’ li tenamit San Juan Chameek, San Pedro Karcha, San Kristobal, Santa Krus re li xteepal li Alta Verapaz.

K'anjel re wakleksink ib'

Xk’eeb’al xkomon li k’anjel re waklesink sa’ eb’ li k’aleb’aal, re te’ ruuq chi wank xjuneseb’ li junq junq chi ch’uut re ixq ut winq, re xchaab’ilobresinkil li sik’ok ib’ re li junkab’lal ut li chan ru nake’wan, jo’ ajwi’ re xk’eeb’al xtz’aqonikeb’ sa’ li tzolok, sa’ li saab’esink ib’ ut sa’ li k’ehok na’leb’ re jolomink.

Xk’eeb’al k’anjel re wakliik ut re sik’ok ib’ sa’ xyaanqeb’ ixq ut winq sa’ eb’ li k’aleb’aal nake’tz’aqon sa’ li ch’uut Xch’ool Ixim ut xk’eeb’al xtz’aqonikeb’ li ixq ut winq sa’ xwankelsinkileb’ li k’aleb’aal.

Ab’an ink’a’ ka’j wi’ a’in, wan aj wi’ chik junjunq li k’anjel yo chi b’aanumank, re xtenq’ankileb’ li komon sa’ li junjunq chi k’aleb’aal wankeb’ sa’ li molam. Qayehaq jo’ xtenq’ankileb’ li qana’chin rik’in li poch’leb’aal b’uch, kemok, tz’uluk,  li komonil k’ayib’aal, li xkawresinkileb’ chi tz’iib’ak ut ilok ru hu li cheekel ixq, xk’eeb’al xchinankil xtz’i’eb’ li qawa’chin sa’ junqaq li k’aleb’aal ut xyiib’ankilatq li tzoleb’aal b’ar wi’ wank li tzolok maay.

Resilal li K'aleb'aal Saqipek

B’ar natawman li molam Xch’ool Ixim

Xb’een rochoch :
Xc'hool Ixim
16. calle, 5-62 Zona 11,
Cobán,
Alta Verapaz, Guatemala


Xkab’ rochoch :
Xc'hool Ixim
12 Avenida 2-48 Zona 1,
Barrio Saclac,
Cobán,
Alta Verapaz, Guatemala


Rox rochoch :
Tzoleb’aal Maay aj K’amolb’e re Komonil
K’aleb’aal Nimlaja’kok
Chiru li b’e li naxik Salakuim
Kob'an,
Alta Verapaz, Guatemala

B’ar naru nakat tz’iib’al chaq :  xchoolixim@hotmail.com

B’oqleb’aal :  (502) 7728-1327

Wi taawaj qaatinankil chi tz’iib’anb’il

Arin naru nakataqla chaq qe junaq li esil malaj li patz’om,

Laak’ab’a’/xq’oot laak’ab’a’ : *

Koreo : *

K’aru nakawaj xyeeb’al qe : *

Xk'utb'esinkil xk'anjel Xch'ool Ixim

A’an a’in xk’utb’esinkil b’ayaq li k’anjel li naxb’aanu li molam Xch’ool Ixim sa’ xteepal Alta Verapaz rik’in roksinkil jun tzolok sa’ qana’leb’ jo’ ajwi’ rik’ineb’ laj k’utunel.

B'ich re kok'al sa' Q'eqchi'

Tz’iib’anb’il xb’aan li najolomin re li molam Xch’ool Ixim jo’ xkomon li k’anjel li nab’aanuman sa’ jun tzolok sa’ ka’paay chi aatinob’aal ut sa’ roksinkil li qaatinob’aal Q’eqchi’.

Xch'olob'ankil li molam Xch'ool Ixim

Li molam Xch’ool Ixim xtenq’a naab’aleb’ chi k’aleb’aal sa’ xteepal Nimlajakok chi xwaklesinkil rib’eb’.